पोखरा महानगरपालिका भित्र सञ्चालित २४१ विद्यालयका १० हजार विद्यार्थीहरू यस वर्षको एसइई परीक्षामा सहभागी हुदैँछन् । महानगरपालिकाको शिक्षा महाशाखाका प्रमुख हेमप्रसाद आचार्यका अनुसार ७९ सामुदायिक र १६२ संस्थागत गरी २४१ विद्यालयका १० हजार छात्रछात्राहरू बिहीबारदेखि सञ्चालन हुने एसइई परीक्षामा सामेल हुन लागेका हुन् ।
कास्कीका ३६ वटा परीक्षा केन्द्रहरूमा परीक्षा सञ्चालन गर्न लागिएको हो । यी मध्ये ३३ वटा परीक्षा केन्द्रहरू पोखरा महानगरपालिका भित्र रहेका छन् । कास्कीको अन्नपूर्ण गाउँपालिकामा २ र माछापुच्छ्रे गाउँपालिकामा एउटा परीक्षा केन्द्र तोकिएको छ ।
महानगरपालिका क्षेत्रमा सञ्चालन हुने परीक्षाको सम्पूर्ण तयारी पुरा भइसकेको छ । पहिलो दिन परीक्षार्थीहरूले अनिवार्य अङ्ग्रेजी विषयको परीक्षा दिनेछन् । संस्कृत वेद विद्याश्रम तर्फ अनिवार्य संस्कृत र मदरसा तर्फ अनिवार्य अरेविक भाषाको परीक्षा हुनेछ । परीक्षा बिहान ८ बजेदेखि ११ बजेसम्म सञ्चालन हुनेछ । परीक्षा चैत १९ गते सम्पन्न हुनेछ ।
देशभरि यस वर्षको परीक्षामा ५ लाख १४ हजार ७१ जना विद्यार्थीहरू सहभागी हुनेछन् ।
