व्यवसायीको समस्या बुझेका भानुभक्त अधिकारी, क्रम संख्या ८ मा मतदाताको आकर्षण
पोखरा । पोखरा उद्योग वाणिज्य संघको ३६औँ महाधिवेशन तथा निर्वाचन नजिकिँदै गर्दा नयाँ नेतृत्वका लागि उम्मेदवारहरूबीच प्रतिस्पर्धा तीव्र बन्दै गएको छ। यसै क्रममा संयुक्त र साझा टिमबाट खुला सदस्य पदका उम्मेदवार भानुभक्त अधिकारी व्यवसायीका वास्तविक समस्या र व्यावहारिक कठिनाइलाई नजिकबाट बुझेका उम्मेदवारका रूपमा चर्चामा आएका छन्। उनी क्रम संख्या ८ बाट चुनावी मैदानमा छन्।
अस्ताम अधिकारी गिफ्ट एण्ड किचन कर्नर, पोखरा–१ हरिचोकका सञ्चालक अधिकारी लामो समयदेखि व्यवसायमा सक्रिय छन्। व्यवसायसँगै सामाजिक क्षेत्रमा समेत निरन्तर सक्रिय उनले इन्द्रेणी एकीकृत विकास केन्द्रको अध्यक्ष तथा पोखरा महानगर सहकारी समितिको विज्ञ सदस्यका रूपमा समेत जिम्मेवारी निर्वाह गर्दै आएका छन्।
व्यवसायलाई कागजी तथ्यांकभन्दा पनि दैनिक जीवनसँग जोडिएको संघर्षका रूपमा बुझेका अधिकारीले व्यवसायीले भोग्ने समस्या नजिकबाट अनुभव गरेका छन्। बजारको अस्थिरता, कर तथा प्रशासनिक झन्झट, व्यवसाय सञ्चालनको कठिनाइ, बढ्दो लागत र व्यवसायमैत्री वातावरणको अभावजस्ता विषयलाई उनले आफ्ना प्राथमिक मुद्दाका रूपमा अघि सारेका छन्।
उनको उम्मेदवारीको मुख्य आधार नै ‘व्यवसायीको कुरा सुन्ने मात्र होइन, सम्बन्धित ठाउँमा प्रभावकारी रूपमा उठाउने’ प्रतिबद्धता रहेको देखिन्छ। अधिकारीले उद्योगी–व्यवसायीका समस्यालाई सम्बन्धित सरकारी निकायसम्म पुर्याउँदै समाधानका लागि निरन्तर पहल गर्ने बताएका छन्।
“व्यवसायीको समस्या मैले नजिकबाट बुझेको छु। संघमा प्रतिनिधित्व पाएँ भने व्यवसायीका आवाजलाई सम्बन्धित निकायसम्म प्रभावकारी रूपमा पुर्याउने र समाधानका लागि निरन्तर पहल गर्नेछु,” अधिकारीले भने।
अधिकारीका अनुसार पोखरा उद्योग वाणिज्य संघ कुनै व्यक्ति वा समूहको मात्र संस्था नभई सम्पूर्ण उद्योगी–व्यवसायीको साझा आवाज हो। त्यसैले संघको नेतृत्व र प्रतिनिधित्वमा व्यक्तिगत स्वार्थभन्दा माथि उठेर पारदर्शिता, समन्वय, साझा हित र व्यवसायीको अधिकारलाई प्राथमिकतामा राखिनुपर्ने उनको धारणा छ।
सामाजिक क्षेत्रमा लामो समयको सक्रियता र विभिन्न संस्थासँगको आबद्धताबाट प्राप्त अनुभवलाई व्यवसायीको हितमा प्रयोग गर्ने उनको प्रतिबद्धता छ। पोखरा भाडा व्यवसायी संघका आजीवन सदस्यसमेत रहेका अधिकारीले व्यवसायी तथा सामाजिक संस्थासँगको निरन्तर सम्पर्कले आफूलाई व्यवसायीका समस्या बुझ्न थप सहयोग पुगेको बताएका छन्।
‘क्रम संख्या ८’ किन चर्चामा..
निर्वाचनको माहोल तातिँदै गर्दा मतदाताले उम्मेदवारको व्यक्तिगत परिचयसँगै व्यवसायीको समस्या बुझ्ने क्षमता, संस्थागत अनुभव र समस्या समाधानका लागि पहल गर्न सक्ने नेतृत्वलाई समेत मूल्यांकन गर्न थालेका छन्। यही सन्दर्भमा व्यवसायमै सक्रिय रहँदै सामाजिक क्षेत्रमा समेत अनुभव हासिल गरेका अधिकारीको उम्मेदवारीलाई अर्थपूर्ण रूपमा हेरिएको छ।
उनले व्यवसायीका लागि व्यवसायमैत्री वातावरण निर्माण, नीतिगत सुधार, कर तथा प्रशासनिक समस्याको सहजीकरण, बजार व्यवस्थापन र सरकारी निकायसँग प्रभावकारी समन्वयलाई प्राथमिकतामा राख्ने बताएका छन्।
पोखरा उद्योग वाणिज्य संघको ३६औँ महाधिवेशनले नयाँ नेतृत्व चयन गर्दै गर्दा व्यवसायीको आवाजलाई बलियोसँग उठाउन सक्ने प्रतिनिधिको खोजी पनि भइरहेको छ। यही अवस्थामा संयुक्त र साझा टिमका क्रम संख्या ८ का उम्मेदवार भानुभक्त अधिकारीले आफूलाई व्यवसायीको आवाज बोकेर संघमा काम गर्ने प्रतिबद्ध उम्मेदवारका रूपमा प्रस्तुत गरेका छन्।
“मतदान केवल व्यक्ति छनोट होइन, व्यवसायीको आवाज कसले बलियोसँग उठाउने भन्ने निर्णय पनि हो,” भन्ने सन्देशसहित अधिकारीले उद्योगी–व्यवसायीसँग क्रम संख्या ८ मा मतदान गरी आफूलाई विजयी गराउन अपिल गरेका छन्।
